|
Cefnogaeth y Llywodraeth ar gyfer Dyfodol Fferm Fach Gan Elen Jones Mae Cynllun Ffermio Cynaliadwy newydd Llywodraeth Cymru wedi denu rhywfaint o ddadlau ymhlith elfennau o’r gymuned ffermio yng Nghymru. Ym mis Ionawr mynychais y digwyddiad yng Nghaernarfon lle bu i lunwyr polisi egluro'r cynllun yn fanwl. Cefais fy syfrdanu’n arw gan ddicter rhai aelodau o’r gynulleidfa yno. Yn fy nghlustiau i roedd y cynllun yn swnio'n wych, gan sicrhau bioamrywiaeth a chynefinoedd ar gyfer y byd mwy-na-dynol, tra'n cefnogi ffermwyr i barhau i ffermio. Mae'r cynllun, sy'n cael ei adolygu ar hyn o bryd, yn ei gwneud yn ofynnol i bob ffermwr ddyrannu 10% o'r tir sydd ar gael yn gynefin a gorchudd coed erbyn 2030. Roedd y ffordd yr eglurwyd yn y digwyddiad yng Nghaernarfon yn ei gwneud yn glir bod sawl amod i gefnogi ffermwyr i gwneud hyn yn y ffordd orau bosibl, gan ystyried cynhyrchiant a rheoli tir. Er fy mod yn deall yn llwyr rwystredigaeth ffermwyr sydd wedi gweld prosiectau niweidiol yn y gorffennol, lle y dyrannwyd ffermdir cwbl dda i blannu coed i ddal carbon, nid dyma y mae llywodraeth Cymru yn ei awgrymu. Mae angen i ni symud oddi wrth y syniad mai fferm ddelfrydol yw ungnwd wal i wal (neu ffens i ffens) o laswellt gwyrdd perffaith heb lwyn na choeden na chlwstwr o ddanadl poethion yn y golwg. Mae yna argyfwng enfawr o bryfed peillio ac mae angen i ffermwyr fod yn ymwybodol o’r dyfodol, gan greu a chynnal cynefinoedd iach i bryfed, madfallod a rhywogaethau allweddol eraill. Yn Fferm Pandy rydym yn dathlu polisi sy’n cefnogi ffermydd bach fel ein un ni, gan gynhyrchu’r bwyd sydd ei angen arnom a gadael lle i fywyd arall ffynnu.
|
